លោក ហាក់ ហុន ប្រធានមន្ទីរធម្មការខេត្តត្បូងឃ្មុំ នៅតែបន្តប្រព្រឹត្តអំពើពុករលួយុយ៉ាងគឃ្លើន
18-August-2016 | ដោយ មែន កំសត់
ប្រភពពីមន្ត្រីរាជការនៃមន្ទីរធម្មការ និងសាសនាខេត្តត្បូងឃ្មុំ បានឲ្យដឹងថារហូតមកដល់ពេលនេះលោក ហាក់ ហុន ជាប្រធានមន្ទីរ ដែលអាងខ្នងបង្អែករឹងមាំនៅក្រសួងធម្មការ កំពុងបន្តប្រព្រឹត្តអំពើពុករលួយដោយគ្មានញញើតអ្វីទាំងអស់។ ហេតុនេះហើយទើបមន្ត្រីរាជការក្នុងមន្ទីរធម្មការ និងសាសនាខេត្តត្បូងឃ្មុំ បានអំពាវនាវឲ្យលោក ហ៊ឹម ឆែម រដ្ឋមន្ត្រីក្រសួងធម្មការ ក៏ដូចជាលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ គួរចាត់វិធានការលើមន្ត្រីពុករលួយរូបនេះកុំឲ្យធ្វើអ្វីៗតាមអំពើចិត្តទៀត។ ដោយហេតុថាមួយរយៈពេលចុងក្រោយនេះ សូម្បីតែលុយលទ្ធកម្ម លុយបុរេប្រទាន និងលុយបេសកកម្មសម្រាប់ការិយាល័យធម្មការតាមបណ្ដាស្រុកនានា ក៏ត្រូវលោក ហាក់ ហុន លេបត្របាក់ដែរ។
ប្រភពដែលស្និទ្ធនឹងលោក ហាក់ ហុន បានឲ្យដឹងថា ការដែលបុគ្គលនេះហ៊ានធ្វើអ្វីៗតាមអំពើចិត្តគឺដោយសារអាងមានលោកស្រី កែវ សុធារី អគ្គនាយិកានៃអគ្គនាយកដ្ឋានរដ្ឋបាល និងហិរញ្ញវត្ថុ នៃក្រសួងធម្មការជាខ្នងបង្អែក។ ទន្ទឹមនឹងនេះក៏មានរដ្ឋលេខាធិការក្រសួងធម្មការ និងសាសនាម្នាក់ជួយបិទបាំងរឿងអាស្រូវពុករលួយរបស់លោក ហាក់ ហុន ផងដែរទើបប្រធានមន្ទីរធម្មការ និងសាសនាខេត្តត្បូងឃ្មុំរូបនេះ បន្តប្រព្រឹត្តអំពើពុករលួយយ៉ាងក្រអឺតក្រទម។ ចំណែកលោក ប្រាជ្ញ ចន្ទ អភិបាលខេត្តត្បូងឃ្មុំ បែរជាធ្វើមិនដឹងមិនឮអ្វីទាំងអស់ ចំពោះអំពើពុករលួយរបស់លោក ហាក់ ហុន ប្រធានមន្ទីរធម្មការ និងសាសនាខេត្តត្បូងឃ្មុំ បើទោះបីមន្ត្រីក្នុងមន្ទីរនេះលាតត្រដាងជាបន្តបន្ទាប់យ៉ាងណាក៏ដោយ។
ប្រភពពីមន្ត្រីនៅក្នុងក្រសួងធម្មការ និងសាសនា មួយចំនួនបានបង្ហើបឲ្យដឹងថាលោកស្រី កែវ សុធារី គឺជាខ្នងបង្អែកដ៏រឹងមាំរបស់លោក ហាក់ ហុន ទើបលោក ហាក់ ហុន កំពុងប្រើអំណាចគាបសង្កត់ទៅលើមន្ត្រីក្រោមឱវាទយ៉ាងក្រអឺតក្រទមបំផុត ហើយបន្តប្រព្រឹត្តអំពើពុករលួយកាន់តែខ្លាំងឡើងៗ។ ដូច្នេះលោក ហ៊ឹម ឆែម រដ្ឋមន្ត្រីក្រសួងធម្មការ និងសាសនា មិនត្រូវបណ្ដែតបណ្ដោយឲ្យមន្ត្រីក្រោមឱវាទធ្វើអ្វីៗតាមអំពើចិត្តទេ ជាពិសេសអំពើពុករលួយបំផ្លាញជាតិរបស់លោក ហាក់ ហុន ប្រធានមន្ទីរធម្មការខេត្តត្បូងឃ្មុំ កំពុងធ្វើឲ្យប៉ះពាល់ដល់កេរ្តិ៍ឈ្មោះក្រសួងធម្មការ និងសាសនាទាំងមូល។ ទន្ទឹមនឹងនេះអង្គភាពប្រឆាំងអំពើពុករលួយ មិនត្រូវបណ្ដែតបណ្ដោយឲ្យមន្ត្រីពុករលួយ ដូចលោក ហាក់ ហុន អាងខ្នងបង្អែកធ្វើអ្វីៗតាមអំពើចិត្តតទៅទៀតទេ ហើយគួរបើកការស៊ើបអង្កេតលើមន្ត្រីពុករលួយរូបនេះជាបន្ទាន់៕
ចំនួនអ្នកទស្សនា
- ថ្ងៃនេះ3031
- ម្សិលមិញ3511
- សប្តាហ៍នេះ15681
- ខែនេះ241351
- ឆ្នាំនេះ241351
- សរុប20683807